Забароны і абмежаванні на наведванне лясоў уведзены ва ўсіх раёнах Беларусі
8 верасня, Мінск . Забароны і абмежаванні на наведванне лясоў уведзены ва ўсіх 118 раёнах Беларусі. Аб гэтым сведчаць даныя інтэрактыўнай карты на інтэрнэт-партале Міністэрства лясной гаспадаркі, .
Па стане на раніцу 8 верасня, абмежаванні на наведванне лясной мясцовасці дзейнічаюць на тэрыторыі ўсіх раёнаў Віцебскай, Мінскай, Гродзенскай і Брэсцкай абласцей.
У Магілёўскай вобласці абмежавана наведванне лясоў у 19 раёнах, у двух — уведзены забароны (Горацкі, Дрыбінскі). У чатырох раёнах Гомельскай вобласці (Брагінскі, Хойніцкі, Жлобінскі, Рагачоўскі) наведванне лясоў таксама пад забаронай. Ва ўсіх астатніх раёнах вобласці ўведзены абмежаванні.
Пры дзейнічанні забароны наведванне лясоў выключана. За парушэнне гэтага правіла прадугледжаны штраф. Калі ж у рэгіёне дзейнічае абмежаванне, то лес могуць наведваць грыбнікі, ягаднікі і аматары пешых прагулак, але з выкананнем патрабаванняў. У прыватнасці, забараняецца заязджаць у масіў на механічным транспарце, раскладаць на месцы агонь, пакідаць прамасленыя або прамочаныя гаручымі рэчывамі матэрыялы.
Забароны і абмежаванні на наведванне лясоў можна прасачыць у рэжыме рэальнага часу на інтэрактыўнай карце Мінлясгаса.
Фота mlh.by
