У музеі Янкі Купалы адкрыецца выстава, прымеркаваная да Дня народнага адзінства
Фота з архіва
14 верасня, Мінск . У Дзяржаўным літаратурным музеі Янкі Купалы 18 верасня адкрыецца выстава «На вялікі сход!», прымеркаваная да Дня народнага адзінства, паведамілі БЕЛТА ва ўстанове.
Праект прысвечаны 110-годдзю п’есы Янкі Купалы «Раскіданае гняздо», закончанай 4 верасня 1913 года. Гэта сацыяльна-псіхалагічная драма з’яўляецца вяршыняй купалаўскай драматургіі. Падзеі ў творы адбываюцца ў рэвалюцыйным 1905 годзе: пачынаюцца летам, у доме сям’і Зяблікаў, і заканчваюцца позняй восенню ў развалінах таго ж, ужо раскіданага, дома.
Выстава пашырыць кантэкст тэматычнага раздзела стацыянарнай выставы «Шляхі», прысвечанай стварэнню і пастаноўцы драмы «Раскіданае гняздо». Сярод экспанатаў — копія першага выдання п’есы 1919 года, падораная музею Прэзідэнтам Беларусі Аляксандрам Лукашэнкам, а таксама цудам уцалелая ў гады Вялікай Айчыннай вайны фатаграфія Янкі Купалы, удзельніка знакавага Народнага сходу Заходняй Беларусі 1939 года.
Выстава прадоўжыць работу да 30 верасня.
