Санэпідслужба назвала тыповыя парушэнні ў арганізацыях аховы здароўя
Фота з архіва
28 ліпеня, Мінск . Інфармацыя аб тыповых парушэннях, выяўленых санэпідслужбай у арганізацыях аховы здароўя, прадстаўлена на сайце Рэспубліканскага цэнтра гігіены, эпідэміялогіі і грамадскага здароўя, .
Спецыялісты органаў і ўстаноў, якія праводзяць дзяржаўны санітарны нагляд, у першым паўгоддзі 2023 года ацанілі больш за 3,8 тыс. арганізацый аховы здароўя. У 97 працэнтах аб’ектаў зарэгістраваны парушэнні патрабаванняў санэпідзаканадаўства.
У ходзе мерапрыемстваў выяўлена больш за 23 тыс. пунктаў парушэнняў. Найбольш часта парушэнні спецыфічных санітарна-эпідэміялагічных патрабаванняў датычыліся правядзення дэзынфекцыі вырабаў медпрызначэння, перадстэрылізацыйнай ачысткі і кантролю яе якасці; правядзення стэрылізацыі вырабаў медпрызначэння і кантролю яе якасці; выканання бялізнавага рэжыму, у тым ліку дэзынфекцыі пасцельных рэчаў; выкарыстання медработнікамі сродкаў індывідуальнай абароны і санітарнага адзення, выканання патрабаванняў да гігіены рук.
Часта рэгістраваліся парушэнні ў плане своечасовасці і якасці правядзення прыбіранняў; забеспячэння належных параметраў мікраклімату, выканання патрабаванняў да асвятлення і водазабеспячэння; арганізацыі харчавання пацыентаў у бальніцах; добраўпарадкавання тэрыторыі, стану фасадаў будынкаў і ўнутранай аддзелкі памяшканняў, а таксама стану мэблі, медтэхнікі і абсталявання.
