Гэта наша зона адказнасці: Качанава нацэліла мясцовыя ўлады на актыўную работу з сем’ямі
Наталля Качанава
15 верасня, Гарадок /Алеся Пушнякова . Моцныя рэгіёны і шчаслівыя сем’і — гэта зона адказнасці ўсіх структур і ведамстваў, якія зацікаўлены ў развіцці як сваіх раёнаў, так і дзяржавы ў цэлым. Такі пасыл заклала ў сваім выступленні на пасяджэнні Гарадоцкага райвыканкама старшыня Савета Рэспублікі Наталля Качанава,
Адной з важных задач у развіцці дзяржавы і моцных рэгіёнаў з’яўляецца стварэнне ўмоў для шчаслівых сем’яў — захавання іх здароўя, умацавання дабрабыту, выхавання і адукацыі дзяцей. На пасяджэнні ў Гарадку разгледзелі, як на прыкладзе раёна рэалізуюцца дзяржпраграмы па гэтых напрамках.
«Гэта наша з вамі зона адказнасці. Вы ў сваім раёне ведаеце амаль усіх, і тут для вас важны кожны чалавек, таму раённая ўлада, старшыні сельсаветаў, кіраўнікі прадпрыемстваў і арганізацый павінны працаваць сумесна», — акцэнтавала ўвагу Наталля Качанава.
Яна прапанавала актыўней працаваць з моладдзю, праводзіць для іх сумесныя мерапрыемствы, дзе маладыя людзі могуць знаёміцца, дзяліцца сваімі інтарэсамі. Магчыма, хтосьці з іх зможа знайсці і сваю другую палавінку, застацца ў раёне і працаваць на яго карысць.
«Гарадок — адзін з лепшых райцэнтраў Віцебскай вобласці, тут ёсць уся неабходная інфраструктура. Трэба, каб абавязкова развіваліся рэгіёны. І шчаслівая сям’я — гэта тое, на чым нам усім трэба сканцэнтравацца», — падкрэсліла спікер.
Таксама ў ліку абмяркоўваемых тэм была і ахова здароўя. У свой час паступіла даручэнне ад Прэзідэнта — захаваць ФАПы. «Нам ФАПы патрэбны, яны абслугоўваюць вялікую колькасць насельніцтва і людзі могуць атрымаць у іх кваліфікаваную дапамогу», — адзначыла старшыня Савета Рэспублікі. А як расказаў галоўны ўрач Гарадоцкай ЦРБ Валерый Самсонаў, у раёне практычна ўсе такія ўстановы адрамантаваны, з 14 існуючых засталося прывесці ў парадак адзін.
«Адной з асноватворных у нашай краіне з’яўляецца Дзяржаўная праграма «Здароўе народа і дэмаграфічная бяспека Рэспублікі Беларусь». Вы ведаеце, якая сур’ёзная ўвага ўдзяляецца ў нас сістэме аховы здароўя, выдзяляюцца сур’ёзныя сродкі, каб выконваць задачы, якія стаяць перад ёй. Калі гаварыць пра дэмаграфічную бяспеку, то мы цудоўна ўсведамляем, што павінны працаваць усе разам, каб статус сям’і, сямейныя каштоўнасці, тое, што мы прапісалі ў Асноўным законе нашай краіны — Канстытуцыі, — сапраўды рэалізоўвалася на практыцы ў адпаведнасці з нашымі традыцыямі. Мы разумеем, што без моцнай сям’і і без таго, што нашы маладыя сем’і будуць нараджаць дзяцей, будучыні няма. Ніякі штучны інтэлект, інтэрнэт-рэсурсы не заменяць чалавека. Якіх высокатэхналагічных робатаў мы ні стваралі б, чалавек стаіць у аснове, а ў нашай краіне тым больш. З боку дзяржавы сем’ям аказваецца значная падтрымка. Разам з тым мы бачым, што ёсць праблема, характэрная для ўсіх развітых краін, — паказчыкі нараджальнасці сёння маглі б быць лепшымі. Заўсёды вяртаюся да абсалютна правільных рашэнняў VI Усебеларускага народнага сходу, якія вызначылі гэтыя прыярытэты — шчаслівая сям’я, дэмаграфічная бяспека, здароўе народа, таму што калі здаровыя члены тваёй сям’і, то ты сапраўды будзеш шчаслівым. Вельмі важна, што нашы мясцовыя органы ўлады разумеюць гэта. Яны даюць ацэнку тым пытанням, якія сёння трэба вырашаць больш аператыўна, каб выканаць усе даведзеныя заданні. Хоць самае галоўнае — наколькі камфортна жывецца людзям тут, у гэтым раёне, наколькі яны сёння могуць атрымаць тое, што гарантуе ім дзяржава», — сказала журналістам Наталля Качанава па выніках пасяджэння.
