БСЖ: жанчыны-прадпрымальнікі Беларусі і Расіі зацікаўлены ў актывізацыі ўзаемадзеяння
14 верасня, Мінск . Беларуска-расійская бізнес-канферэнцыя «Жаночы бізнес. Міжнародная інтэграцыя. Інавацыйнае развіццё» адкрылася ў Мінску,
Ініцыятыва правядзення форуму накіравана на пабудову камунікацый жанчын-прадпрымальнікаў Беларусі і Расіі. Тэматыка — абмеркаванне тэхналагічных трэндаў, вырашэнне пытанняў імпартазамяшчэння і выклікаў бягучага часу. Несумненна, жанчыны ўносяць важкі ўклад у рэалізацыю інавацыйных, эканамічных, сацыяльных, гуманітарных ініцыятыў і праектаў. Пашырэнне і падтрымка яркіх прыкладаў жаночага прадпрымальніцтва — важнейшы напрамак канферэнцыі. Міжнародная бізнес-канферэнцыя — ідэальная пляцоўка, якая дасць магчымасць абазначыць і абмеркаваць актуальныя пытанні ўзаемадзеяння органаў улады, грамадскіх арганізацый і жанчын-прадпрымальнікаў дзвюх краін.
Цэнтральным мерапрыемствам з’яўляецца правядзенне міжнароднай біржы субкантрактацыі сярод жанчын-прадпрымальнікаў Беларусі і Расіі ў прамысловасці, фармацыі, медыцыне, харчовай галіне, лагістыцы, сельскай гаспадарцы, кансалтынгу, інфраструктуры падтрымкі прадпрымальніцтва, бізнес-адукацыі. Адзін з асноўных напрамкаў складання камунікацый — малы і сярэдні бізнес.
«Гэта канферэнцыя нацэлена на тое, каб была кансалідацыя намаганняў паміж расійскім і беларускім бізнесам, інтэграваліся інтарэсы, каб ствараліся пляцоўкі, якія дадуць новыя формы развіцця і магчымасці для ўзаемадзеяння паміж беларускім і расійскім бізнесам, асабліва ў жаночых колах, — адзначыла старшыня крыла прадпрымальнікаў Беларускага саюза жанчын Алена Прохарава. — Бізнес — гэта зыходны пункт для развіцця эканомікі. Мы аб’ядноўваем інтарэсы бізнес-супольнасцей у рамках Беларускага саюза жанчын, Асамблея жанчын-кіраўнікоў Расіі таксама аб’ядноўвае намаганні расійскага бізнесу, а інтэграцыя двух грамадскіх аб’яднанняў у рамках нашага міждзяржаўнага партнёрства, думаю, дасць новы віток і магчымасці, якія на сённяшні дзень былі закрыты. Таму такая цудоўная форма ўзаемадзеяння дасць новы віток для руху ў правільным напрамку».
Паводле яе слоў, гэта пляцоўка можа стаць традыцыйнай. «Тут усё залежыць ад нас. Мы да гэтага прыкладзём максімальную колькасць намаганняў. Думаю, усё атрымаецца, каб праводзіць гэту канферэнцыю штогод і, напэўна, мяняць лакацыі. Думаю, што гэта будуць не толькі цэнтральныя рэгіёны нашых краін, але і абласныя цэнтры Беларусі і федэральныя акругі РФ. Самае галоўнае, каб было імкненне да таго, каб гэта ўзаемадзеянне было рэгулярным», — дапоўніла Алена Прохарава.
Арганізатарамі беларуска-расійскай бізнес-канферэнцыі выступаюць агульнарасійская грамадская арганізацыя «Асамблея жанчын-кіраўнікоў», Мінская гарадская арганізацыя і крыло прадпрымальнікаў грамадскага аб’яднання «Беларускі саюз жанчын», базавы цэнтр падтрымкі прадпрымальніцтва Віцебскай вобласці пры падтрымцы Дэпартамента па прадпрымальніцтве Міністэрства эканомікі, Беларускага фонду фінансавай падтрымкі прадпрымальнікаў і Беларускага саюза жанчын.
